लितपुर, असार ४ गते । नेपाली काँग्रेसले मित्र राष्ट्रहरूले गरेको अन्तर्राष्ट्रिय खोप सहयोगको घोषणालाई स्वागत गर्दै नेपालमा सङ्क्रमणको स्थितिलाई ध्यानमा राखी जति सक्दो खोप सहयोग उपलब्ध गराउन अनुरोध
गरेको छ ।
सभापति शेरबहादुर देउवाको अध्यक्षतामा पार्टी केन्द्रीय कार्यालय ललितपुरमा बिहीबार बसेको केन्द्रीय कार्यसमितिको बैठकले यस्तो आग्रह गर्ने निर्णय गरेको हो । पहिलो खोप पाउनेहरूले समेत दोस्रो खोप नपाउँदा पहिलो खोपको प्रभाव पनि निष्प्रभावी बन्दैछ भन्दै बैठकले नेपाली काँग्रेस फेरि पनि सरकारलाई आम नेपाली जनतालाई खोपको सुनिश्चितता गर्न माग पनि गरेको छ ।
बैठकमा महामन्त्री पूर्णबहादुर खड्काले पार्टीको चौधौँ महाधिवेशनको संशोधित कार्यतालिकालगायत विभिन्न प्रस्ताव प्रस्तुत गर्नुभएको जानकारी पार्टीका मुख्य सचिव कृष्णप्रसाद पौडेलले दिनुभयो ।
बैठकपछि जारी विज्ञप्तिमा वर्षाका कारण ठूलो जनधनको क्षति भएको उल्लेख गर्दै हरेक वर्षायाममा आउने यस प्रकारको विपत्तिबाट जोगिन पूर्वतयारीमा जुट्नुपर्नेमा जोड दिइएको छ ।
बैठकले विस्थापित मानिसलाई सुरक्षित स्थलतर्फ स्थानान्तरण गर्न र राहत कार्यमा जिम्मेदारीपूर्वक युद्धस्तरमा जुट्न सरकारको गम्भीरतापूर्वक ध्यानाकर्षण गराएको छ ।
लकडाउनका कारण आर्थिक सङ्कटमा परेका निम्न वर्ग र श्रमिकहरूलाई तत्काल राहतको व्यवस्था गर्न मागसमेत गरिएको छ । यसैगरी बन्दका कारण साना, मझौला व्यवसायीहरूले भोग्नुपरेको मर्कालाई ध्यानमा राखी ब्याजदरमा राहत, भाडामा राहत सहयोग तथा पुनर्कर्जाको व्यवस्था सुनिश्चित गर्न भनिएको छ ।
बागमती प्रदेश सभा सदस्य नरोत्तम वैद्यले सदनमा बोलेका कुरा संसद्को रेकर्डबाट हटाइएपछि पनि उहाँविरुद्ध जाहेरी दर्ता गरिएकोमा गम्भीर ध्यानाकर्षण भएको जनाइएको छ । बिहीबारको बैठकमा केन्द्रीय सदस्य कृष्णप्रसाद सिटौला, महेश आचार्य, ज्ञानेन्द्रबहादुर कार्की, दिलेन्द्रप्रसाद बडू, उमाकान्त चौधरी, शङ्कर भण्डारी, गगनकुमार थापा, कल्याणकुमार गुरुङ, मोहनबहादुर बस्नेत, रमेश लेखक, शिवप्रसाद हुमागाईं र डा. टीएन योगीले धारणा राख्नुभएको थियो ।
महाधिवेशनको कार्यतालिका परिवर्तन गर्नेलगायतका विषयमा छलफल गर्न शुक्रबार १ बजे पुनः बैठक बस्ने छ ।
कमेन्ट गर्नुहोस्